بیجنگ: (آن لائن). اگرچہ فولڈنگ موبائل فون پر کافی کمپنیاں کام کررہی تھیں تاہم چین کی ایک غیر معروف موبائل کمپنی رویول نے دنیا کا پہلا فولڈنگ موبائل تیار کرکے ماہرین کو حیران کردیا ہے.
چینی کمپنی کے تیار کردہ فولڈنگ موبائل میں لچک دار ڈسپلے والی ایمولیڈ ٹیکنالوجی استعمال کی گئی ہے اور یہ فولڈنگ موبائل ایک وقت میں فون بھی ہے اور ٹیبلٹ کا کام بھی کرتا ہے۔ کھل جانے کے بعد اسمارٹ فون کا اسکرین 7.8 انچ اسکرین تک پہنچتا ہے۔ ڈسپلے کو اس طرح ڈیزائن کیا گیا ہے کہ دو لاکھ مرتبہ بھی کھلنے اور بند ہونے کے بعد خراب نہیں ہوتا۔ اس ماڈل کو فلیکس پائی کا نام دیا گیا ہے۔
اس فولڈنگ موبائل میں کوالکوم نیکسٹ جنریشن اسنیپ ڈریگن 8 سیریز ایس او سی پروسیسر لگایا گیا ہے۔ ریم 8 جی بی ہے جبکہ 128 سے 256 جی بی تک اسٹوریج کی گنجائش ہے۔ ڈوئیل کیمرے میں 20 میگا پکسل کیمرا ٹیلی فوٹو سینسر کے ساتھ اور 16 ایم پی وائڈ اینگل کیمرا نصب ہے۔
اگرچہ اس میں کوئی شک نہیں کہ یہ دنیا کا پہلا فولڈنگ موبائل فون ہے تاہم تجزیہ کاروں نے اس کے ڈیزائن کو بہت بے کشش قرار دیا ہے۔
نئے فون کے آپریٹنگ سسٹم کو واٹر او ایس کا نام دیا گیا ہے جو اینڈروئڈ نائن پائی کے متبادل ہے۔ اسمارٹ فون کو دسمبر کے آخر میں فروخت کے لیے پیش کیا جائے گا جن کی قیمتیں 1300 ڈالر برائے 128 جی بی اور 256 جی بی کی قیمت 1469 ڈالر رکھی گئی ہیں۔
