لاہور ( آن لائن) قومی ٹیم مینجمنٹ، کپتان اور سینئر کھلاڑی آل راؤنڈر عماد وسیم کے روئیے سے سخت ناراض ہوگئے جو دوسرے ٹی 20 میچ میں اوور مکمل کرنے کے بعد کپتان کو بتائے بغیر باہر چلے گئے اور اس وجہ سے ہی انہیں تیسرے ٹی 20میچ سے باہر کیا گیا۔
تفصیلات کے مطابق قومی کرکٹ ٹیم کو دورہ نیوزی کے دوران ابتدائی دو ٹی 20 میچز میں شکست کا سامنا کرنا پڑا، دوسرے ٹی 20 میچ کے دوران ٹیم مینجمنٹ آل راؤنڈرعماد وسیم کے روئیے سے ناراض ہوئی کیونکہ وہ اپنا اوورمکمل کرنے کے بعد پٹھے میں کچھاؤ کا بہانہ کر کے گراؤنڈ سے باہر گئے۔
ٹیم کے کپتان شاداب خان بھی اس معاملے سے لاعلم نکلے اور سینئر کھلاڑیوں نے ڈریسنگ روم میں شاداب خان سے میچ کے دوران عماد وسیم کے روئیے کی شکایت کی۔ ذرائع کے مطابق شاداب خان عماد وسیم کے رویے پر ناراض ہوئے اور ٹیم مینجمنٹ کو شکایت کر دی جس کی وجہ سے عماد وسیم کو تیسرے ٹی 20 میچ سے ڈراپ کیا گیا جبکہ مصباح الحق نے کھلاڑیوں کو نظم و ضبط کا خیال رکھنے کا لیکچر بھی دیا۔
