لاہور (آن لائن) نیوزی لینڈ کیخلاف پہلے ٹیسٹ میچ کیلئے قومی ٹیم کے کپتان مقرر ہونے والے محمد رضوان نے پاکستان ٹیسٹ ٹیم کو ٹی 20 سکواڈ سے زیادہ مضبوط قرار دیدیا ہے۔
پاکستان کرکٹ بورڈ (پی سی بی) کی جانب سے جاری بیان میں محمد رضوان نے کہا کہ اس اہم میچ میں بابراعظم کی کمی محسوس ضرور ہو گی، ہم نے چار گھنٹے سے زائد پریکٹس کی ہے اور اس وقت ہمارے باؤلرز اور بیٹسمین دونوں ہی اچھے ردھم میں لگ رہے ہیں۔
انہوں نے کہا کہ پاکستان شاہینز کی فتح سے کھلاڑیوں کے حوصلے بلند ہیں جبکہ ٹی 20 کی نسبت ہمارا ٹیسٹ سکواڈ زیادہ تجربہ کار ہے، شان مسعود، اظہر علی، فواد عالم اور حارث سہیل جیسے بیٹسمین دستیاب ہیں ہمارے پاس محمد عباس، یاسر شاہ اور شاہین شاہ آفریدی جیسے ٹیسٹ باﺅلرز بھی موجود ہیں۔
ان کا کہنا تھا کہ بابراعظم کی کمی ضرور محسوس ہو گی، وہ انجری کے باوجود جس طرح ٹریننگ سیشنز میں موجود رہتے ہیں، انتہائی قابل ستائش ہے، بابر اعظم باہر بیٹھ کر بھی ہر بیٹسمین کو اپنا تجربہ شیئر کررہے ہیں، امید ہے کہ نیوزی لینڈ کیساتھ اچھا مقابلہ دیکھنے کا موقع ملے گا، ہم محنت پوری کریں گے، نتائج اللہ کے ہاتھ میں ہیں۔
